Vœuja de Natal

Col cœur an'mò ingarbiaa in de la cassina
el se bestira i òss l'ultim paisan,
e la candela pizza in la bosia
la mett in ciar i barlafus d'un temp:
la bròcca in del tripee portacadin,
l'acquasantin e la Maria Bambina
fassada in de la cuna d'un veder a campana.
E l'œucc el curr sui trav e sul camin
con dent an'mò freguj de scendra antiga.
La vœuja de Natal l'è lì con lù
sul materass de fœuja de melgon.
La vœuja d'un Natal come una vòlta,
con tanti vos che riven de lontan,
come in d'un sògn...
Vos de tusann che canten sul sentee...
là in fond... tra i fontanitt... visin al Lamber...
"Tu scendi dalle stelle..."
Sù dunca! Riva gent!
Gh'è chi el Natal, Natal come 'na vòlta...
Mett ul pariœu sul fœugh...
canela, acqua e saa, farina gialda...
e...alé...òli de gumbat.
Se sgrana trii rosari
e se la cuntom sù dent in la stalla.
Gh'è chì l'Armida, quella di ricamm,
el Gino cavallant cunt el clarin...
i fiœu ch'hinn mai cressuu, el bergamin.
Tra el pòrtich e la stala... quanta gent...
ghe vœur an'mò un quej scagn, una bancheta
e un para de fiaschitt... per la polenta.
Se smorza la candela sul ciffon,
el gatt al s'è fognaa in d'un quej canton
e intant l'ultim paisan
el nega in d'un bell sògn...
e par ch'el rida.

Marco Candiani

Lascia un commento

Il tuo indirizzo email non sarà pubblicato. I campi obbligatori sono contrassegnati *