I BUTEGH D’UNA VOLTA

In di nost paés
fin a n’quei ann fa
i negozi lavuravan,
eran sempar pien da gent
che la spesa la fasevan
tütt i dì, anca par nient.
Fö da cà par un michin
o a cumprà un quei salamin,
senza carta ne danée
“conto aperto” cul pustée
che al segnava tütt i spes:
sa pagava a fin dal mes!

Sciur Giüsepp, na facia bôna,
suridénta la sua dona.
Gh’era pö la merceria
dô surell in là cui ann,
un bugétt pien de butun
ogni sorta de cutun
rutulaa sü na spuléta
“merceria de la Migliéta”!
Gh’era ul Silvio macelar
e ‘l Martino prestinée,
sa regordi anca ul magnan
e ‘l latt frésch d’un paisan!

Gh’era tütt par i bisôgn
de la gent in di butégh
ma per prim la simpatia
e quel “Ciao, ‘mé la và”
che ‘l ta faseva sentì a cà,
mia in un Centro Commerciale,
a fà la fila cul carell!
ma vöt met me l’era bell
rivà dent in la butéga
e truvà da drée al bancun
una facia cugnusüda
sempru a tua dispusiziun!!

ELVIA BUTTI

Lascia un commento

Il tuo indirizzo email non sarà pubblicato. I campi obbligatori sono contrassegnati *

Questo sito usa Akismet per ridurre lo spam. Scopri come i tuoi dati vengono elaborati.