– Giùsepp… Giùsepp desedas che l’è ura!
– De fa cusè Maria? Lasum istà;
duman gh’emm de nà via, de bun ura,
prima che riva scià ul padrun de cà.
– Ma l’e na stala Giusèpp e al faa anca frecc
ul böö… la faa amicizia cunt l’asnin
e ul calur del fööch, te vist, na va pel tecc,
dai büüs nei tegul, al post che pel camin.
Però chì almen l’è succ, che fœra al fioca,
al par un gran tapee, bianc cume ‘l latt.
La luus che fa la lumm… l’è propi poca
e pö,.. inviass adess, … saria de matt.
Ta vœt minga capì, car ul me spus,
è minga rivaa ‘l mument de leva sù,
ma che ‘l Bambin al ma farà sentì la vus.
e menu mal, che urmai na podi pü.
– O signur, voo a ciamà ‘na levatrice,
mi sunt un omm, se ‘n soo de sti mestee?
– Damm a trà Giùsepp, e famm felice:
tegnum la man e… credum… che l’è aséé.
Ecu, l’è scià, tegnum puséé visin.
La nocc la pasa prima brascià sù.
Mett un zicc d’acqua calda in del cadin
e pö… vegn scià, strengium sù e parla pù.
